Ijtimoiy tarmoqlarning birida Navoiy shahar markazida qurilgan yangi "Vosxod” bozorida quruvchiga 100 foiz to‘lov qilib berilgan bo‘lsa ham, oxirigacha tugatib topshirilmaganligidan va bozor atrofi qurilish chiqindilari bilan ifloslanayotganidan shikoyat qilingani aks etgan video murojaatga Navoiy shahar hokimligi RASMIY MUNOSABAT bildiradi. 

Navoiy shahar hokimining 2019-yil 10-iyundagi Q-566-sonli "Navoiy shahar I.Karimov shox ko‘chasi bo‘ylab joylashgan "Guliston” dehqon bozorini rekonstruksiya qilish hamda 2-qavatini qurilishiga ilovada ko‘rsatilgan fuqarolar (obyekt egalari)ga ruxsat berish to‘g‘risida”gi qaroriga asosan "Guliston” dehqon bozori hududidagi do‘konlarni qayta qurish (rekonstruksiya qilish hamda 2-qavat qilib qurish) ishlarini, "Guliston” dehqon bozoridagi do‘konlarning barchasi xususiy bo‘lganligi sababli, do‘kon egalari tomonidan "TEMUR ASLON Chorvasi” MChJ bilan ikki tomonlama shartnoma asosida bajarilishi belgilangan. 

Bugungi kunda "Guliston” dehqon bozori hududidagi savdo do‘konlarining qurilish ishlari yakunlanganligi, do‘qon egalari va quruvchi o‘rtasidagi shartnoma shartlariga asosan yakuniy to‘lovlar hisob-qitobi hamda qabul qilish–topshirish ishlari qolganligi ma’lum qilinadi.

 

Shuningdek, "Guliston” dehqon bozori hududida ayni vaqtda  qurilish va boshqa chiqindilar yo‘qligi, bozor hududida o‘z vaqtida doimiy tozalik ishlari olib borilishi bildiriladi.