НАВОИЙ ШАҲАР ҲОКИМИНИНГ ҚАРОРИ

Навоий вилояти ҳокимининг 2021 йил 24 апрелдаги "Ўзбекистон Республикаси Президентининг 2021 йил 21 апрелдаги "Ёшлар саноат ва тадбиркорлик зоналари фаолиятини ташкил этиш ҳамда ёшларнинг тадбиркорликка оид ташаббусларини қўллаб-қувватлаш чора-тадбирлари тўғрисида”ги ПҚ-5088-сонли қарори ижросини таъминлаш тўғрисида”ги Қ-64-сонли қарори тўғрисида

Ёшларнинг тадбиркорликка оид ташаббуслари, стартап-лойиҳалари
ва амалий тадқиқотлари натижаларининг рўёбга чиқарилишига кўмаклашиш, ёш тадбиркорлик субъектларининг саноат ва хизмат кўрсатиш соҳаларидаги лойиҳаларини ҳар томонлама қўллаб-қувватлаш, шунингдек,
2017–2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини "Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид давлат дастурида белгиланган вазифалар ижросини таъминлаш мақсадида,

 

Қ А Р О Р   Қ И Л А М А Н:

 

1. Навоий вилояти ҳокимининг 2021 йил 24 апрелдаги "Ўзбекистон Республикаси Президентининг 2021 йил 21 апрелдаги "Ёшлар саноат ва тадбиркорлик зоналари фаолиятини ташкил этиш ҳамда ёшларнинг тадбиркорликка оид ташаббусларини қўллаб-қувватлаш чора-тадбирлари тўғрисида”ги ПҚ-5088-сонли қарори ижросини таъминлаш тўғрисида”ги
Қ-64-сонли қарори ижро учун қабул қилинсин.

2. Ўзбекистон Республикаси Президентининг мазкур қарори билан қуйидагилар:

Инвестициялар ва ташқи савдо вазирлиги, Иқтисодий тараққиёт
ва камбағалликни қисқартириш вазирлиги, Молия вазирлиги, Савдо-саноат палатаси ҳамда Ёшлар ишлари агентлигининг Навоий шаҳри бўйича
1-иловага мувофиқ рўйхатда кўрсатилган ҳудудда ёшлар саноат ва тадбиркорлик зоналарини (кейинги ўринларда – Ёшлар саноат зоналари) ташкил этиш тўғрисидаги таклифи маъқулланганлиги;

ташкил этилаётган Ёшлар саноат зоналарининг асосий вазифалари белгиланганлиги;

Ёшлар саноат ва тадбиркорлик зоналарини йўл-транспорт, муҳандислик-коммуникация инфратузилмаси билан таъминлашнинг манзилли дастури (кейинги ўринларда – Манзилли дастур) тасдиқланганлиги;

Инвестициялар ва ташқи савдо вазирлигида юридик шахс мақомига эга бўлмаган Ёш тадбиркорларни қўллаб-қувватлаш жамғармаси (кейинги ўринларда – Жамғарма) ташкил этилиши белгиланганлиги маълумот учун қабул қилинсин.

3. Шаҳар ҳокими ўринбосарлари (Ш.Джонузоқов ва Б.Қодиров) 1-иловага мувофиқ кўрсатилган ҳудудда ёшлар саноат ва тадбиркорлик зоналари ташкил этилишини таъминласин.

4. Шаҳар инвестициялар ва ташқи савдо бўлими (Д.Бобомуродов) мутасадди бўлим ва ташкилотлар билан биргаликда:

1-иловада келтирилган Ёшлар саноат зонаси – 2021 йил 1 сентябргача тўлиқ ишга туширилишини таъминласин.

5. Ёшлар саноат ва тадбиркорлик зонасиини йўл-транспорт, муҳандислик-коммуникация инфратузилмаси билан таъминлашнинг манзилли дастури ижроси бўйича масъуллар 2-иловага мувофиқ бириктирилсин.

6. Ёшлар саноат зоналарига жойлаштириш учун инвестиция лойиҳаларини танлаб олиш бўйича тузилган ишчи гуруҳ таркиби 3-иловага мувофиқ тасдиқлансин.

7. Ўзбекистон Республикаси Президентининг қарори билан қуйидагилар белгилаб қўйилганлиги инобатга олинсин:

а) Манзилли дастурда назарда тутилган ишлар 2021 – 2023 йилларга мўлжалланган Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури доирасида иқтисод қилинган маблағлар, шунингдек, маҳаллий бюджет ва таъминотчи ташкилотларнинг ўз маблағлари ҳисобидан амалга оширилади;

б) Ёшлар саноат зоналари муҳандислик-техник коммуникациялари мавжуд бўлган ёки ўтказиш осон бўлган, фаолият кўрсатмаётган ишлаб чиқариш майдонлари ва қишлоқ хўжалигига мўлжалланмаган ер майдонларида ташкил этилади;

в) Ёшлар саноат зоналарига жойлаштириш учун инвестиция лойиҳалари туман (шаҳар) ҳокимлари раҳбарлигида тузилган ишчи гуруҳлари томонидан танлаб олинади;

г) Ёшлар саноат зоналари ҳудудида майдони 1000 м²  гача бўлган
ер участкалари, истисно тариқасида, электрон аукцион савдоси ўтказмасдан, халқ депутатлари туман (шаҳар) Кенгашларининг қарори билан ажратилади. Бунда, бўш бино ва иншоотлар (давлат кўчмас мулк объектлари) шартнома асосида ҳар йили Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан давлат кўчмас мулкидан фойдаланганлик учун белгиланадиган ижара тўловининг энг кам миқдоридан ошмаган ставкаларида ижарага берилади;

д) патент асосида ишлаб чиқаришни йўлга қўйишни таъминловчи
стартап-инвестиция лойиҳалари, инновацион маҳсулотлар ишлаб чиқаришга мўлжалланган инвестиция лойиҳалари, шунингдек, импорт ўрнини босадиган ва экспортга йўналтирилган рақобатбардош маҳаллий саноат маҳсулотлари ишлаб чиқариш ҳамда яратиладиган янги иш ўринларининг камида 70 фоизи ёшлар учун мўлжалланган, шу жумладан бандлиги таъминланмаган "Ёшлар дафтари”га киритилган ёшларни иш билан таъминлаш назарда тутилган инвестиция лойиҳалари Ёшлар саноат зоналари ҳудудида жойлаштирилишида устуворликка эга бўлади;

е) Жамғарма маблағлари ҳисобидан молиялаштириладиган инвестиция лойиҳалари доирасида:

молиявий ресурслар тижорат банклари томонидан бир ёш тадбиркорлик субъекти учун бир йўла 100 минг АҚШ доллари эквивалентидан ошмаган миқдорда 7 йилгача муддат билан тақдим этилади;

қиймати 100 минг АҚШ доллари эквивалентигача бўлган инвестиция лойиҳалари Жамғарма маблағлари ҳисобидан молиялаштирилади, ундан ошган қисми эса ушбу қарорда назарда тутилган имтиёзларсиз, тижорат банклари орқали умумий тартибда тақдим этилади;

тижорат банкларига инвестиция лойиҳаларини молиялаштириш учун молиявий ресурслар Жамғарманинг мавжуд маблағлари доирасида, миллий валютадаги кредитлар бўйича йиллик 10 фоиз, хорижий валютадаги кредитлар бўйича йиллик 2 фоиз ставкалари билан тақдим этилади;

тижорат банклари миллий валютадаги кредитларни ўз маржаси миқдорини
4 фоиздан оширмасдан йиллик 14 фоиз, хорижий валютадаги кредитларни – ўз маржаси миқдорини 1 фоиздан оширмасдан йиллик фоиз ставкасини 3 фоиз миқдорида белгилаган ҳолда ажратади;

тижорат банклари ажратилган молиявий ресурсларнинг мақсадли фойдаланилиши ва тўлиқ қайтарилишини доимий мониторинг қилиб боради;

ж) Жамғарма маблағлари ҳисобидан тижорат банкларига Ёшлар саноат зоналари ҳудудида ишлаб чиқариш ва хизмат кўрсатиш учун бинолар қуриш мақсадларига молиявий ресурслар Жамғарманинг молиявий кўрсаткичлари ва унинг ресурс базасидан келиб чиққан ҳолда берилади, шу жумладан:

Жамғарма маблағлари ҳисобидан тижорат банкларига ёш тадбиркорлик субъектлари учун бино қуришга бериладиган молиявий ресурслар миллий валютада йиллик 10 фоиз ставкаси миқдорида белгиланган ҳолда тақдим қилинади;

тижорат банклари томонидан ёш тадбиркорлик субъектларига биноларни лизинг асосида бериш миллий валютада йиллик 14 фоиз ставкасини қўллаган ҳолда амалга оширилади.

Бунда, ёш тадбиркорлик субъекти бошланғич тўлов сифатида лизингга бериладиган бино қийматининг 10 фоизини ташкил қилувчи қисмини тўлайди.

8. Шаҳар инвестициялар ва ташқи савдо бўлими (Д.Бобомуродов) Марказий банкнинг вилоят бош бошқармаси (Х.Пардаев) билан келишган ҳолда ҳамда мутасадди бўлим ва ташкилотлар, мазкур қарорнинг 7-бандида назарда тутилган белгиланган тартибларга қатъий риоя этилишини таъминласин.

9. Шаҳар инвестициялар ва ташқи савдо бўлими (Д.Бобомуродов) зиммасига Ёшлар саноат зоналари фаолиятини мувофиқлаштириб бориш вазифаси юклатилсин.

10. Шаҳар ҳокимининг Мотбуот котиби (О.Аслонов) бир кун муддатда ушбу қарор лойиҳасини Навоий шаҳар ҳокимлигининг (navoiy.uz) веб-сайтида ҳамда оммавий ахборот воситаларида ёритилишини таъминласин.

11. Мазкур қарор ижросини назорат қилиш шаҳар ҳокими ўринбосари Ш.Джонузоқов зиммасига юклансин.

 

 

Шаҳар ҳокими                                                              М.Базаров