Шаҳримиздаги 11-давлат ихтисослаштирилган умумтаълим мактабининг мажлислар залида Президент Ислом Каримовнинг “Ўрта асрлар алломалари ва мутафаккирларининг тарихий мероси, унинг замонавий цивилизация ривожидаги роли ва аҳамияти” мавзусидаги халқаро конференциянинг очилиш маросимида сўзлаган нутқи юзасидан тадбир уюштирилди.Уни шаҳар ҳокими Неъматилло Ахатов очди ва олиб борди.

Таълим муассасалари раҳбарлари, ўқитувчи ҳамда ўқувчилар иштирокида ўтказилган мазкур йиғилишда шаҳар ҳокими истиқлол йилларида мамлакатимизда олиб борилаётган кенг кўламдаги бунёдкорлик ишлари, амалга оширилаётган ислоҳотлар тўғрисида батафсил тўхталди.Ўрта аср алломалари ва мутафаккирларининг тарихий мероси бутун дунёга таътигулик аҳамиятга эга эканлиги, ҳанузгача ўша буюк инсонлар қолдириб кетган илмий мерослар бугунги кун цивилизацияси ривожига ҳисса қўшаётганлигини таъкидлади.

- Маълумки, Ўрта Осиё илмий-маданий мероси қадимий тарихга эга, - дейди Халқ таълими вазирлиги вакили Н.Каримов. – Юртбошимиз сўзлаган нутқида буюк алломаларимизнинг дунё ҳамжамиятидаги нуфузи ҳақида тўлқинланиб гапирдилар. Бугунги тадбирдан кўзланган асосий мақсад ҳам бутун дунёда шуҳрат қозонган Абу Райхон Беруний, Ал-Хоразмий, Аҳмад-Фарғоний, Ибн Сино, Мирзо Улуғбек каби мутафаккир бобокалонларимиз томонидан амалга оширилган кашфиётлар замонавий илм-фан тараққиёти учун нақадар аҳамиятли эканлигини ёшларимизга ўргатишдан иборат.

Йиғилиш давомида шоир Бақо Саид ҳамда Навоий давлат педагогика институти ўқитувчиси Хуршид Қурбоновлар ҳам мавзуга оид маърузалари билан қатнашиб, иштирокчиларга керакли маълумотларни беришди.