Куни кеча ижтимоий тармоқларда Навоий шаҳри Маҳмуд Торобий кўчаси 108-110-уйларда яшовчи бир гуруҳ фуқаролар томонидан  иситиш тизими талабга жавоб бермаслиги, иссиқ сув келмаётганлиги, уйнинг ертўласида эса қишин-ёзин сув оқиб ётишини ва бадбўй ҳид тарқалиши сингари ҳолатларни ўзида акс эттирган хабарлар тарқалди.

Ушбу ҳолат бугун, яъни 7 ноябрь куни тегишли мутасаддилар томонидан жойига бориб ўрганилди.

Ўзбекистон Республикаси Президентининг Навоий шаҳар Халқ қабулхонаси мутахассиси С.Шадманов, Навоий шаҳар 3-сектор масъул котиби Ф.Нормуродов, Навоий шаҳар уй-жой коммунал хўжалиги бўлими мутахассиси Х.Каримов ва Навоий шаҳар "Ёшлик зиё сервис” ХУЖМШ раиси Ф.Бобоевлардан тузилган ишчи гуруҳи хабарда акс этган ҳолатларни бирма-бир кўздан кечирди.

Ўрганиш жараёнида ҳозирда ушбу кўп қаватли уйларда иссиқ сув ва иситиш тизими  яхши йўлга қўйилганлиги ва ертўлаларда ҳеч қандай нохуш ҳидлар чиқмаётганлиги ва ертўлани сув босмагани ҳолати аниқланди.

 Шунингдек, ишчи гуруҳ аъзолари томонидан ушбу кўп қаватли уйларда яшовчи фуқаролар билан суҳбат ўтказилганда ҳақиқатдан ҳам 3 ноябрдан 7 ноябрга қадар "Навоий кон металлургия комбинати” давлат корхонасига қарашли Бирлашган энергия хизмати (ОЭС)  томонидан ушбу кўп қаватли уйларга келадиган марказий иссиқ сув қувурларида носозлик бўлганлиги ва таъмирлаш ишлари олиб борилганлиги сабабли вақтинча иссиқ сув ва иситиш тизими ишламаганлиги маълум бўлди.

👉Навоий шаҳар ҳокимлиги Ахборот хизмати:@Navoiy_shahar_axborot_xizmat