Шаҳар ҳокимлигининг мажлислар залида дорихоналар, таълим муассасалари ҳамда корхона ва ташкилотларда фитобарлар ташкил этиш мавзуида йиғилиш бўлиб ўтди. Унда вилоят соғлиқни сақлаш бошқармаси, вилоят санитария-эпидемиология назорати маркази, "Дори-дармон” акциядорлик жамияти раҳбарлари, шаҳарда фаолият олиб бораётган дорихоналар, тижорат банклари ҳамда ўқув муассасалари вакиллари иштирок этишди. Юртимиз ҳудудида кўплаб доривор ўсимликлар учрайдики, уларнинг таркибидаги унсурлар шифобахшлиги билан ажралиб туради. Бугун мамлакатимиз табиатида учрайдиган 86 турдаги гиёҳлар минг дардга даводир. Бу ўсимликларнинг 8 туридан шифокор тавсияси билан бемалол уй шароитида дори тайёрлаш мумкин. Жумладан, наъматак, дўлана, лимон ўти, дала чойи, кийик ўти, аччиқ шувоқ каби доривор ўсимликлардан қандай фойдаланишни кўпчилигимиз яхши биламиз. Уларни исталган дорихонадан қадоқланган ҳолда сотиб олиш ҳам мумкин. Йиғилишда доришунослар олдида турган асосий масала фитобарлар ташкил этиш ва гиёҳлардан дамламалар, қайнатмалар тайёрлаш ҳамда турли синтетик дориларига муқобил сифатида тавсия этиш лозимлиги таъкидланди. Шунингдек, муҳокама жараёнида мутасаддилар томонидан қисқа муддатларда барча дорихоналарда ва таълим муассасаларида фитобарлар ташкил этиш ҳамда уларни доривор гиёҳлар билан таъминлаш тартиблари келишиб олинди. Шу ўринда доривор гиёҳларни етиштириш, қадоқлаш, улардан турли препаратлар тайёрлашга ихтисослашган янги лойиҳаларни ишлаб чиқиш ва амалга оширишни қўллаб-қувватлаш, тижорат банклари орқали уларга имтиёзли кредитлар ажратиш масалалари ҳам атрофлича муҳокама қилинди.