ЁШ МУСАВВИР АСАРЛАРИ ЖИЛОСИ

03-11-2015 19:54 Navoiy shahri

Шаҳримиздаги Санъат галереясида "Биз – сенинг фарзандларингмиз, Ўзбекистон” мавзуида ижодий кўргазма очилди. Ўзбекистон Бадиий ижодкорлар уюшмаси Навоий вилоят бўлими ҳамда "Камолот” ёшлар ижтимоий ҳаракати ҳамкорлигида ўтказилган тадбирда Кармана туманидаги 5-умумтаълим мактаби 9-синф ўқувчиси Рухсора Райимованинг миниатюра жанридаги композициялари намойиш этилди. 2014 йилда "Камалак юлдузлари” болалар ижодиёти фестивалида қатнашиб, унинг республика ҳал қилувчи босқичи ғолиби бўлган бу истеъдодли ёш ижодкор республика, вилоят, шаҳар миқёсидаги бадиий кўргазмаларда фаол иштирок этиб, қувончли натижаларга эришмоқда. Рухсора миниатюранинг ўзига хос усулларида, янги, замонавий кўринишдаги ноёб асарлар яратмоқда. Асарларида халқимизнинг миллий урф-одатлари ва анъаналарини тасвирлайдиган бу ижодкор қиз "Семурғ”, "Кўза кўтарган бола”, "Суҳбат”, "Фарҳод ва Ширин” ҳамда "Карвон” каби асарларида миллий қадриятларимизни ранглар жилосида юксак маҳорат билан акс эттирган. Кўргазмага келаётган навоийликлар ва шаҳримиз меҳмонлари, тасвирий санъат ихлосмандлари томонидан ҳам ёш мусаввир ижоди юқори баҳоланмоқда. – Ижодий фаолиятимдаги илк ютуқларим юртдошларимизга манзур бўлаётганидан беҳад мамнунман, – дейди Рухсора Райимова. – Фаолиятимдаги дастлабки ютуқларим, шубҳасиз мамлакатимизда давлатимиз раҳбари ва ҳукуматимиз томонидан ўқувчи-ёшларнинг қобилият ва иқтидорларини тўла рўёбга чиқаришлари учун яратилган шарт-шароитлар туфайли, деб биламан. Мақсадим – келгусида дунёда бетакрор юртимиз сувратини яратишдир.

Agarda Siz maqolada xatoni uchratgan bo‘lsangiz, unda matnni belgilab, (CTRL + ENTER) tugmasini bosing va sayt administratoriga xabarnoma jo‘nating.