Яқинда ижтимоий тармоқларда Навоий шаҳар Ибн Сино кўчаси 26-уй 216-уйда яшовчи фуқаро Амина Ҳамдамованинг ётоқхонада яшаб келаётганлиги, имтиёзли асосда уй-жой олишда амалий ёрдамга муҳтожлигини ўзида ифода этган видеомурожаати эълон қилинди.

Мазкур мурожаат Навоий шаҳар ҳокимлиги назорати остида тегишли масъуллардан ишчи гуруҳ тузилган ҳолда ўрганиб чиқилди.

Фуқаро Ҳамдамова Амина Ҳамдамовна 1995 йил 3 августда Навоий шаҳрида туғилган. Амина Ҳамдамова Навоий шаҳар ҳокимлиги уй-жой ва ётоқхоналардан фойдаланиш бошқармаси тасарруфидаги Навоий шаҳар Ибн Сино кўчаси 26-уйда жойлашган 2-сонли ётоқхонанинг 204-сонли хонаси 2 (икки) ўрин жойда онаси К.Бабанарова ва икки нафар вояга етмаган фарзандлари билан яшаб келмоқда. 

Фуқаро Ҳамдамова Амина Ҳамдамовна 2020 йилнинг март ойида Россия давлатидан қайтиб келгандан кейин иккинчи фарзанди Ҳамдамова Аниса Ҳамдамовна 2020 йил 21 апрелда Навоий шаҳрида таваллуд топган. А.Ҳамдамовага 2020 йилнинг июнь ойидан икки ёшгача бола парвариш нафақаси тайинланган. Бундан ташқари, ўтган йили август ойида 880 000 сўм, вояга етмаган 16 ёшга тўлмаган болалари учун бир марталик 1 000 000 сўм микдорида моддий ёрдам берилган.

Фуқаро "Ёшлар дафтари”га киритилган бўлиб, унга ҳайдовчилик гувоҳномасига ўқитиш ва субсидия асосида компьютер жамланмаси берилиши тўғрисида тавсиялар берилган. Бундан ташқари, фуқаро А.Ҳамдамовага уй-жой олиш тартиби бир неча маротаба тушунтирилган.

А.Ҳамдамова яшаб келаётган 204-сонли хона К.Бабанарова номига ижара шартномаси асосида расмийлаштирилган. Ҳозирги кунда ётохонанинг 1-ўрин жойи 95000 (тўқсон беш минг) сўм этиб белгиланган бўлиб, фуқаро А.Ҳамдамова оила аъзолари билан 1 хонада 4 киши яшаётган бўлса-да, 2 ўрин-жой учун ижара шартномасига асосан ойига 190 000 (бир юз тўқсон минг) сўм тўловни амалга ошириб келмоқда.

Ўзбекистон Республикаси Вазирлар Маҳкамасининг 2020 йил 25 мартдаги "Уй-жой сотиб олиш учун фуқароларга субсидия тўлаш тартиби тўғрисидаги низомни тасдиқлаш ҳақида”ги 182-сонли қарори ва Вазирлар Маҳкамасининг 285-сонли қарори асосида уй-жой олиши учун фуқаро авваламбор доимий ишга эга бўлиши кераклиги белгиланган. Ҳозирги кунда эса фуқаронинг фарзанди эндигина бир ёшдан ошганлиги сабабли ишга чиқиш имконияти ҳам кам эканлиги аниқланди ва бу бўйича фуқарога қонуний тушунтириш берилди.

Навоий шаҳар Маҳалла ва оилани

 қўллаб-қувватлаш бўлими.